నాసదియసూక్తం

~ ఋగ్ వేదం | వైరుధ్యం (Paradox) | విశ్వస్వరూపం | Vedic Science

చాలా దూరం ప్రయాణం చేసాం. చాలా ప్రయాసపడ్డాం. చాలా ప్రశ్నలు అడిగాం. చాలా అభిమతాలు (Theories) వెల్లడించాం. గణిత సమీకరణాలంకృతాలయిన సిద్ధాంతాలు పరిశీలించచాం. గ్రీకులతో మొదలుపెట్టి, గెలిలియో, న్యూటన్, మేక్‌స్వెల్, అయిన్‌స్టయిన్, మొదలైన ఎందరో మహానుభావుల పేర్లు స్మరించాం, వారికి మన వందనాలు అర్పించుకున్నాం. విశ్వ రహస్యాలని ఛేదించటానికి విశ్వప్రయత్నాలు చేసాం.

కాని చివరికి మిగిలినది ఏమిటి?
ఈ వ్యాస పరంపరని ఏ ప్రశ్నలతో మొదలుపెట్టామో ఆ ప్రశ్నలే సమాధానాలు లేకుండా మిగిలిపోయాయి!

ఈ విశ్వం ఎందుకు ఉంది? అంటే, ఈ విశ్వం యొక్క ఉనికికి కారణం ఏమిటి? ఈ విశ్వం పనిచేసే తీరు ఏమిటి? ఈ విశ్వనిర్మాణానికి వాడబడ్డ ఘటకద్రవ్యాలు ఏమిటి? ఈ విశ్వం ప్రాదుర్భావానికి కారణభూతులు ఎవరు? మహావిస్పోటనంతో విశ్వం పుట్టింది అన్నారు. ఈ మహావిస్పోటనం ఎందుకు జరిగింది? ఈ విస్పోటనంతోటే స్థలం, కాలం పుట్టేయని అన్నాం కదా. విస్పోటనానికి ‘ముందు’ స్థలమే లేకపోతే ఆ పేలిన పదార్ధం (బ్రహ్మ పదార్ధం?) ఎక్కడ ఉండేది?

మహావిస్పోటనంలోనే కాలం పుట్టినప్పుడు ‘విస్పోటనానికి ముందు’ అనే సమాసానికి అర్ధం ఉందా?

పోనీ, పైన అడిగిన ప్రశ్నలకి వేదాంత ధోరణిలో తప్ప శాస్త్రీయ ధోరణిలో సమాధానాలు చెప్పలేమని ఒప్పేసుకుందాం (మాటవరసకి).
మన ప్రశ్నలని భౌతిక శాస్త్రం విధించిన పరిధిలోనే అడుగుదాం. పదార్ధం పరమాణు రేణువులతో తయారయింది అన్నారు కదా. కొన్ని పరమాణు రేణువుల అస్తిత్వానికి నిలకడ (అంటే స్థిరత్వం) ఉండి, కొన్నింటికి లేదు. ఎందుకని? మనిషి ఎంత పొడుగున్నాడో, ఎంత బరువున్నాడో కొలిచినంత మాత్రాన ఆ మనిషి తత్త్వం అర్ధం అవుతుందా? అలాగే మనం చేసినదల్లా విశ్వంలోని అంశాలని కొన్నింటిని – దూరాలు, వేగాలు, కాలాలు, గరిమలు, ఆవేశాలు, మొదలైన భౌతిక రాశులని – కొలిచేం. అంతే కాని ఈ విశ్వం యొక్క తత్త్వాన్ని అర్ధం చేసుకోలేదు. ఈ విశ్వం యొక్క అస్తిత్వానికి కారణం ఏమిటి? ఈ రకం ప్రశ్నలకి ఆధినిక భౌతిక శాస్త్రం ఆమోదకరమైన సమాధానాలు ఇవ్వలేకపోతోంది – ఇప్పటివరకు కూడా!!!!!

అంటే ఏమిటన్నమాట? కొన్ని రకాల ప్రశ్నలకి సమాధానాలు ఎక్కడ దొరుకుతాయో మనకే తెలియటం లేదు. మరికొన్ని రకాల ప్రశ్నలకి సమాధానాలు ఇంకా అధునాతనమైన అభిమతాలలో దొరకొచ్చనే ఆశ ఉంది.

ప్రస్తుతానికి మొదటి రకం ప్రశ్నలకి సమాధానాలు మరొక కోణం నుండి వెతుకుదాం.

ఈ మొదటి రకం ప్రశ్నలు భారతదేశంలో వర్ధిల్లిన సనాతన ధర్మ కర్తలు ఎప్పుడో వేదకాలంలోనే లేవదీశారు. ఋగ్వేదంలో (10.129) నాసదీయ సూక్తం అనే మంత్రం ఉంది. ఈ మంత్రం లోని భావం భాషకి అతీతం. యోగాభ్యాసం చేసిన మునులు అనుభవించి అవగాహన చేసుకున్న బ్రహ్మ సత్యాన్ని భాష విధించిన శృంఖలాలకి బద్ధులై చెప్పేరు. వారు చెప్పదలుచుకున్న విషయాన్ని భాషలోబంధించి చెప్పేసరికి సగం భావం నశించిపోయి ఉంటుంది. మిగిలినదానిని ఇంగ్లీషులోకో, తెలుగులోకో దింపి చెప్పటానికి ప్రయత్నిస్తే మరో వన్నె తరిగిపోతుంది. అయినా సరే నాసదీయ సూక్తంలోని ఏడు శ్లోకాలలోని భావాన్ని, స్పూరించిన విధంగా వ్యాఖ్యానించి తెలుగులో చెప్పటానికి ప్రయత్నం చేద్దాం.

నాసదీయ సూక్తంలో, శ్లోకానికి నాలుగు పాదాల చొప్పున ఏడు శ్లోకాలు ఉన్నాయి. ప్రతి శ్లోకంలోను మొదటి పాదంలో చెప్పదలుచుకున్న ముఖ్యాంశం ఉంటుంది, మిగిలిన మూడు పాదాలలో కొంత వివరణ ఉంటుంది. ఈ శ్లోకాలని అర్ధం చేసుకోటానికి ముందుగా ‘సత్’ అనే మాటకి ‘అసత్’ అనే మాటకి ఉన్న విస్తృతార్ధం మనం గ్రహించాలి. “సత్” అంటే సత్వం లేదా అస్తిత్వం. దీనినే ఇంగ్లీషులో ‘బీయింగ్’ (being) అనిన్నీ ‘ఎగ్జిస్‌టెన్స్’ (existence) అనిన్నీ అనొచ్చు. తెలుగులో “ఉనికి” అని కాని, ‘ఉండటం’ అని కాని చెప్పుకోవచ్చు.

సత్ అంటే ఏమిటో చెప్పేను కనుక దీనికి వ్యతిరేకమైన లేక విరుద్ధమైన అర్ధంతో ‘అసత్’ అనే మాటని వాడదాం. అసత్ అంటే నాస్తిత్వం. సంస్కృతంలో ‘న’ అంటే లేదు, కాదు అనే అర్ధాలు ఉన్నాయి. కనుక శ్లోకం మొదట్లోనే ‘న అసత్, న సత్’ అనే ద్వంద్వ విరుద్ధ భావాలతో మొదలు అవుతుంది. అందుకనే దీనిని నాసదీయ సూక్తం అన్నారు.

ఈ నాసదీయ సూక్తం నుంచి ఏడు మంత్రాలు ఏమిటో చూద్దాం:

నాసదీయసూక్తం – 7 మంత్రములు!

♦ 1వ మంత్రం:
► || నసదాసీన్నో సదాసీత్ తదానీం ||

సృష్ట్యాదిలో ఉనికి అనేది లేదు, ఉనికి లేకపోవటం అనేది లేదు. ఆదిలో మనకి అవగతమయే విశ్వం లేదు. అంతరిక్షం లేదు. అంతరిక్షానికి అవతల ఏమీ లేదు. కాని ఏదీ లేదనటానికి వీలు లేదు. ఆ ఉన్నదేదో అనంతమైన సాంద్రత కలిగి ఉంది. (అంటే, ఏదో ఉందనే భావం)
••••••••
శాస్త్రవేత్తల పరిశోదన ప్రకారం ఇప్పటికి కేవలం 5% విశ్వం గురించి తెలుసుకున్నారు కాని ఇప్పటికీ కొన్నిట్ల గురించి తెలుసుకోలేకపోతున్నారు…
విశ్వం గురించి తెలుసుకునంతవరకు MATTER అంటారు…. దానికి అవతల ఉన్నదాన్ని DARK MATTER అంటారు. అందులో ఏముందో ఎవరికీ తెలియదు… కాని ఏదో ఉందని మాత్రం అంటున్నారు.

విశ్వస్వరూపం అంటూ “ఋగ్ వేదం”లో ఉన్న నసదియ సూక్తం మనకి ఏనాడో తెలియజేసింది.
••••••••

♦ 2వ మంత్రం:
► || న మృత్యురాసీదమృతం న తర్హి న రాత్ర్యా ||

మృత్యువు లేదు, అమరత్వం లేదు, నామరూపాలు లేవు, రాత్రింబవళ్లు లేవు. “ఇది” తప్ప మరింకేమీ లేదు! ఆ “ఇది” ఏమయ్యుంటుంది అనే ప్రశ్న లేవదీస్తుంది ఈ సూక్తం!!

♦ 3వ మంత్రం
► || తమ ఆసీత్ తమసా గుళమగ్రే ||

అవగాహనకి అందని ఆ “ఇది” మన అవగాహనకి అందని విధంగా దాగి ఉంది. అంతా చీకటితో ఆవృతమైన చిట్టచీకటి. ఆ “ఇది” ఏమైతేనేమి, అది నామరూపాలు లేని శూన్యం. (శూన్యం కూడ పూర్తిగా “శూన్యం” కాదని గుళిక శాస్త్రం చెబుతోంది కదా!). తాపం వల్ల దానికి అస్తిత్వం సిద్ధించింది.

♦ 4వ మంత్రం
► || కామస్తదగ్రే సమవర్తతాధి మనసోరేత ||

ఆ ఆదిలో కోరిక జనించింది. అది ఉనికికి, ఉనికి లేకపోవటానికి మధ్య ఉన్న తెరని ఛేదించింది. ఇచ్ఛ వల్ల విశ్వం వికసించింది. (వికసించి, వ్యాప్తి చెందింది)

♦ 5వ మంత్రం
► || రేతోధ ఆసన్ మహిమాన ఆసన్ త్స్వ ||

బీజం అలా నాటటంతో మహా శక్తులు నాలుగు దిశలలో ఉద్భవించేయి

♦ 6వ మంత్రం
► || కో అద్ధ వేద క ఇహ ప్రవోచత్ | కుత అజాతా కుత ఇయాం విసృష్టిః ||

ఈ సృష్టి ఎలా జరిగిందో ఎవరు చెప్పగలరు? దేవగణాలకి కూడా
పుట్టుకకు తరువాతే ఈ ఉనికి సిద్ధించింది.
••••••••
వేమన చరిత్ర చిత్రంలో ఒక విషయం గురించి ప్రస్తావన వస్తుంది.. ఈశ్వరుడు ఒక వృద్దుని రూపంలో వచ్చి ఇలా అంటారు. దేవతలకు కూడా తెలియని సృష్టి రహస్యం మానవుడవు, నీకెలా తెలుస్తుంది అని!
ఈ సన్నివేశం ఇక్కడ చూడవచ్చు http://bit.do/fF4i4
••••••••

♦ 7వ మంత్రం
► || యో అస్యాధ్యక్షః పరమే వ్యోమన్ | త్సో అఙ్గ వేద యది వా న వేద ||

ఈ సృష్టికి కారణ భూతమైన కారణం ఉందో లేదో తెలియదు. ఈ సృష్టికార్యం అనే ప్రహేళికకి పరిష్కారం ఉందో, లేదో! ఆ సృష్టికర్తకే తెలియాలి. బహుశా వాడికి కూడా తెలియదేమో.
──────────────────────────────
ఇంత నిగూఢ రహస్యాలను మన ఋషులు ఎంత చక్కగా చెప్పిఉన్నారో… చాలా అద్భుతం! అదీ మన “ఋషులు” మరియు మన సనాతన ధర్మం యొక్క విశిష్టత గొప్పతనం!